Farewell! thou art too dear for my possessing <body marginwidth="0" marginheight="0" bgcolor="#ffffff" border=0 >

March 3, 2003

ده‌ڵێم بریا منیش كه‌مێك زۆرتر پێشكه‌وتوو ده‌بووم و جیهانی ده‌ژیام، به‌ڵام وادیاره نابێ. حه‌ز ده‌که‌م بزانم ئه‌وانی دێنه ئورووپا و ئیتر چیتر بیر و تاسه‌ی شار و شارۆچكه‌ و گونده‌كانی خۆیان ناكه‌ن و بێ خه‌م و خه‌یاڵ‌ ده‌ژین، چۆن بیر ده‌که‌نه‌وه و مێشكیان چۆن ئیش ده‌كات !!! به‌ڕاست خۆزگه به‌م جۆره ئینسانانه، كه‌یفی خۆیان ده‌که‌ن و بیر له كه‌س ناكه‌نه‌وه ، منیش له جل و به‌رگ و زۆر شتی خۆم لێده‌ده‌م تا ... ، هه‌ر لێی گه‌رێ !!!

دانیشتبووم چاوم له وێنه‌ی سروشتی شوێنه‌ جۆر به جۆره‌کانی ئێره ده‌كرد كه پــــــــه‌ریله گرتبوونی و زۆریش جوان بوون . بیرم كرده‌وه هه‌میشه پێم وابوو ئه‌گه رۆژێكی له شوێنێكی ئاوا بژیم زۆر به‌خته‌وه‌ر ده‌بم و یان هیچ نه‌بێ تام و چێژێكی تایبه‌ت له ژیان وه‌رده‌گرم ... كه‌چی ئێستا هه‌ر دێت و زۆرتر بیری سروشتی بێگه‌ردی لای خۆمان ده‌كه‌م و تاسه‌یی ئۆقره‌ی لێ هه‌ڵگرتووم. زۆر بیری ئـــــــــــه‌وێ ده‌كه‌م ... ، به‌تایبه‌ت ئه‌م ڕۆژانه كه ده‌زانم له‌وێ ئه‌وه به‌فره‌كان ورده ورده ده‌توێنه‌وه و هه‌موو جێیه‌ك پڕ‌ده‌بێ له بۆنی به‌هار . به هه‌ر گه‌ره‌كێكیدا بڕۆی چه‌ند ماڵ ‌خه‌ریكی ماڵ ‌هه‌ڵگرتنه‌وه‌ن و تۆزته‌كێن لێدان و هه‌ندێ ماڵ فه‌رشه‌كانیان ده‌شۆن ، جێگه و بان هه‌ڵده‌خه‌ن و شووشه‌ی په‌‌نجه‌ران ده‌سڕنه‌وه ... ده‌ڵێی له‌وێ سه‌رباقی هه‌موو سه‌ختی و چه‌له‌مه‌ی ژیان، هه‌میشه شتێك هه‌یه ده‌ستی پێوه بگری و هه‌ستێوه.

لێم وه‌ده‌نگ مه‌ین پێم بڵێن : وانییه و هه‌وڵ بده چێژ له ژیان وه‌رگری و چووزانم شتی وا. بیری ئه‌وێم كردووه و به ده‌ستی خۆم نییه. خۆ هه‌ر له سه‌ره‌تاوه گوتم من زۆر پێشكه‌وتوو نیم و ناتوانم جیهانی بژیم!!!! دیاره ئه‌گه واش بڵێن قسه‌یه‌کی خراپتان نه‌كردووه ، ڕاسته، هه‌ڵه‌ی منه ، من ده‌بێ ئه‌و "هه‌ست و مه‌سته‌ی" وه‌ڵا نێم و كه‌مێك بێ‌خه‌یاڵتر بژیم . منیش ده‌بێ بیری زۆر كه‌س و زۆر شتان لاده‌م و زۆرتر بیر له خۆم بكه‌‌مه‌وه و له ده‌ره‌وه‌ی دونیای كه‌س و كار و خاك و وڵات بژیم!!! ده‌بێ من كه‌مێك زۆرتر خۆپه‌رست بم و بیر له زۆر شتان نه‌که‌مه‌وه .

ئێستا بۆ باسی ئه‌و شتانه ده‌که‌م ؟ گوێ ده‌ده‌مه سرودی " خوایه وه‌ته‌ن ئاوا كه‌ی ....." . ئه‌م سروده من ده‌باته‌وه سه‌رده‌می منداڵیم و به‌هار و خۆ ماندوو كردنه‌كانی دایكم و ...

****
خۆ ده‌زانم له وڵاته داگیر كراوه پارچه پارچه‌كه‌ی من ، زۆر شت كه‌‌مه و زۆر شت هه‌ر نین. خۆ ده‌زانم نه ئازادی هه‌یه و نه مافی ژیان ... خۆ ده‌زانم ئێستا له‌وێش، له وڵاتی خۆشم، خۆم به میوان ده‌زانم ، میوانێكی بێ‌قه‌در ... به‌ڵام چی بكه‌م بیرم كردووه ... بیرم كردووه و دڵم بۆی لێده‌دات .....




www.flickr.com

| | contact | Font
- - - - - - -

----------