|
March 13, 2003
هاوڕێم : ده‌مه‌و ئێواره‌یه. بارانێكی توند ده‌بارێ. ئه‌و شنه فێنكه‌ی له نێوان ده‌نكه درشته‌‌كانی بارانه‌كه خۆی ده‌رباز ده‌كات و وێت ده‌که‌وێت، ته‌زێك ده‌خاته گیانته‌وه . ئه‌مڕۆ له‌م ڕۆژانه‌یه كه حه‌زم ده‌كرد له ژێر پتو بمێنه‌وه و تا ئه‌و جێیه‌یی ده‌كرێ، خۆم بسپێرمه ده‌ست خه‌و، خه‌یاڵ ... یان هه‌ر چی كه دووره له بێداری ... ئاسمان سه‌یر ناوچاوانی تێك ناوه ... له‌شی ڕۆژ له ڕه‌شایی هه‌وره‌كانا مه‌لۆتكه كراوه ... بارانێكی توند ده‌بارێ .... ده‌زانی ... بیری تۆم كردووه ... بیری دیتنی تۆ، شاره‌كه‌م ، گه‌ره‌که كۆن و خۆڵاوییه‌كان ... یان نا ... زۆر ده‌مێكه بیرم له شاره‌كه‌مان نه‌کردۆته‌وه . زۆر ده‌مێكه خه‌ونتان پێوه نابینم ... زۆر ده‌مێكه ده‌ڵێی له جنسی ئێوه نیم ... نه ئێره به ماڵی خۆم ده‌زانم و نه ئه‌وێ ... ده‌ڵێی نه خه‌ڵكی ئێره‌م ونه خه‌ڵكی ئه‌وێ ده‌زانی، جار نا وا هه‌ست ده‌كه‌م قسه‌كانی ڕۆژانه ماندووم ده‌كات . گوتنی "من باشم و تۆ چۆنی و سڵاو بگه‌ینه" قسه‌ی من و تۆ نییه ... ده‌زانی ، هه‌ر ئه‌و هه‌سته كه به قه‌د بیره‌كانی خۆم ناژیم ، تاڵی مردنم وه‌‌بیر ده‌خاته‌وه ... |
