|
December 20, 2005
Tomorrow may never come for all we know هاوار به ماڵم، دیسان ساڵێک گه‌وره‌تر بووم وهیچشم به هیچ نه‌کردووه هێشتا! به‌ڵام ئه‌مشه‌و، كه زۆر سارده و من له ژێر په‌توو شینه‌كه‌م خۆم گرمۆڵه كردووه، بیر له‌و ساڵانه‌ی تا ئێستا تێپه‌ڕیوون ده‌كه‌مه‌وه، بیر كه ده‌كه‌مه‌وه ده‌توانم بڵێم تا ڕاده‌یه‌ک وا ژیاوم كه خۆم ویستوومه. بێ گومان نه ته‌واو و نه به قه‌د بیره‌كانی خۆم. سه‌یر نییه، ئاخر منیش په‌روه‌رده‌ی ئه‌و ئاو و خاكه‌م كه تێیدا فێری "هه‌ڵبژاردن" نابین. منیش له‌وێرا هاتووم كه مرۆڤ هه‌ندێ جار ده‌بێت به ئاواتی دایكوباوكی و هه‌ندێ جار خۆ ده‌شكێنێته‌وه تا له چوارچێوه ته‌سكه‌كاندا جێی بێته‌وه. ئه‌و سالانه‌ی تا ئێستا تێپه‌ڕیون، هه‌وراز و نشیوه‌كان، دوور كه‌وتنه‌وه‌كان، كه‌وتن و كه‌وتن و هه‌ستانه‌وه‌كان زۆرتر و دژوارتر له چاوه‌ڕوانی و هێزی من بوون. هه‌ندێ جارده‌كه‌ومه‌وه بیری ئاواته سه‌یر و زۆر جار ساكاره‌كانی ساڵانی منداڵیم، بیــــــــری ئه‌و ساڵانه‌ی پڕ بوون له ده‌نگی ته‌قه و بۆنی باڕووت و هه‌موو ئاواتی من ئه‌وه بوو حه‌و‌شه‌كه‌مان باخچه‌ی هه‌با. ئه‌و سه‌رده‌مه‌ی هه‌موو شتێک بۆنی باوه‌ڕی لێده‌هات و ئاواتی هه‌ره گه‌وره‌م ئه‌وه بوو وه‌ک "خوشكه له‌یــــــلا" كه وێنه‌كه‌یم له ناو كتێبه‌كانمدا ده‌شارده‌وه، ببم به پێشمه‌رگه و له‌ویش سه‌یرتر پێم خۆش بوو دوای ژیانێكی چریكی له سێداره بدرێم، مردنی ئاسایم به لاوه شه‌رم بوو. له كچیژێكی دونیا نه‌دیتووی گه‌وره بووی ناو دونیای كتێبان، كه ساڵانێكی زۆر ده‌گه‌ڵ ئه‌وینی "پاوڵ" قاره‌مانی ناو "چگونه فولاد آبدیده شد" ژیاوه، چاوه‌ڕوانێكی له‌مه زۆرتریش نییه، هه‌یه؟ گه‌وره‌تر كه بووم، خه‌یاڵی سه‌فه‌ر شه‌و و ڕۆژ ده‌گه‌ڵما بوو. هه‌میشه خۆم ده‌دیت كۆڵه پشتییه‌كم به كۆڵه‌وه، شاره‌و شار، وڵات و وڵات ده‌گه‌ڕێم و ده‌نووسم. منی هه‌ژار شه‌و نه‌بوو خه‌و به "مه‌یدانی سوور"، "نیل"، " تاج مه‌حه‌ل" و "سه‌حرا وشكه‌كانی ئه‌فریقا" وه نه‌بینم. ئێستاش دڵنیا نیم شته‌كان چۆن وایان لێ هات، باوه‌ڕ ناكه‌م له سه‌ره‌تاوه، بڕیارێک بووبێ خۆم به وشیاری دابێتم، به‌س له‌بیرمه هه‌میشه له ناو ئه‌و چوارچێوانه‌ی بۆیان هه‌ڵده‌به‌ستین، ئارام و قه‌رارم نه‌بوو. دڵنیام وشیاری نه‌بوو. جۆرێک لاساری كردن بوو. جۆرێک كه‌لله ڕه‌قی خۆم و هه‌ڵومه‌رجی ئه‌و سه‌رده‌مه ڕه‌نگه، نازانم! من و هاوته‌مه‌نه‌كانم له سه‌رده‌مێكدا گه‌وره بووین كه كه‌س نه‌یده‌دیتین. ئاخر ئه‌و سالانه شه‌ڕ بوو و شۆڕش بوو و ئێمه‌ی منداڵ ده‌بایه زوو گه‌وره بین، تێكه‌ڵاوی جۆرێک ترس، تاسه، بۆشایی و سه‌ر لێشێواوی. منداڵیمان له پێچ و په‌نای شۆرش و شه‌ڕدا ون بوو و گه‌وره ساڵیمان هه‌موو ترس و شكانه‌وه و تاسه بوو. باس یان له‌وانه‌ی پێش ئێمه‌یه كه له ژێر ئاڵای "ئیسمێک" ، شۆرشیان كرد و شایان وه‌ده‌رنا یان بوون به پێشمه‌رگه، یان له‌وانه‌ی دوای ئێمه كه ده‌یان ساڵ دوای ئه‌و شه‌ڕ و شۆرشه، بێ هیچ ئیمان و باوه‌ڕێک، هیوای داهاتووی ئه‌م وڵاته‌ن. منیش له‌و ناوه‌دا نه قه‌ت توانیم ئیمانم به هیچ باوه‌ڕێک هه‌بێ و نه بێ باوه‌ڕی قه‌ت توانی ببێ به باوه‌ڕم! سه‌ر لێشێواوییه‌كانی ئه‌و سالانه زۆر بوون تا بێره گه‌یشتووم، ئێره‌ش كه ده‌ڵێم نازانم كوێیه ها! هێشتا نازانم تا كوێی ڕێگه‌ی به‌ر پێم بڕیوه. هه‌ندێ جار پێموایه گه‌یشتوومه‌ته ئه‌و شوێنه‌ی كه به ته‌مای بووم، هه‌ندێ جار نه ده‌زانم بۆ لێره‌م نه ده‌زانم ده‌مه‌وێ له كوێ بم! من هێشتاش نازانم ده‌مه‌وێ چۆن بم كه ئێستا وا نیم، یان چۆن نه‌بم كه ئێستا وام! هه‌ندێ جار بیرده‌كه‌مه‌وه ڕه‌نگه له ژیانێكدا كه له دایک بوون و مردنم به ویستی خۆم نه‌بووه، نابێ چاوه‌ڕوانییه‌كی زۆرم بێ. كه‌چی زۆر جاریش ده‌لێم ئێستا كه هاتن و ڕۆیشتنم به ویستی خۆم نییه، ده‌رفه‌تی بوونم ده‌بێ به ئاره‌زوو و ویستی خۆم تێپه‌ڕ بێ. باوه‌ڕ ناكه‌م له ژیان شتێكی زۆرم ویستبێ، جگه له‌وه‌ی بتوانم خۆم رێگه‌ی خۆم هه‌ڵبژێرم، ڕێگه‌یه‌ک، خۆم به خۆم بگه‌یه‌نێت. ڕێگه‌یه‌ک ئه‌گه هیچ نه‌بێ، ڕه‌نگی ئه‌زمۆنه‌كانی خۆمی بێ. ڕێگه‌یه‌ک جێ پێی خۆمی پێوه دیار بێ. بیر كه ده‌كه‌مه‌وه ده‌بینم زۆر بێ ڕه‌حمانه له‌وه بێ به‌ش كراوین. له‌وه كه بوێرین هه‌ڵه بكه‌ین، كه پێویست نه‌بێ به ئاگری بریارێكی هه‌ڵه هه‌تا هه‌تایه بسووتێین و داغی مۆرێک له ناوچاوانمان بدرێ. كه ده‌رفه‌تی هه‌ڵه و ته‌جره‌به كردنت پێ نه‌درێ، چۆن مرۆڤ بتوانێ خۆی و شته‌كان بناسێ؟ بیر كه ده‌كه‌مه‌وه، شته‌كان له لای ئێمه زۆر سه‌یر تێكه‌ڵ كراون. ترس و شه‌رم و ڕێز، سنوورێكی نادیاریان هه‌یه. لێی كه ورد ده‌بمه‌وه ده‌بینم ترسه و ناومان ناوه شه‌رم، ترسه و ناومان ناوه ڕێز. ترسه و ناومان ناوه چاره‌نووس ... هه‌موومان، هه‌ر كاممان به شێوه‌یه‌ک، هه‌میشه به ترسه‌وه ده‌ژین! نا، شتێكی زۆرم له ژیان نه‌ویستووه، ئه‌وه نه‌بێ بتوانم خۆم ڕێگه‌ی خۆم هه‌ڵبژێرم و ده‌زانم، زۆر باش ده‌زانم هه‌ر ئه‌و ویسته ساكاره، زۆر زۆرتر له‌وه‌یه كه قسمه‌ت یان چاره‌نووس، خوا یان شه‌یتان و كورد بوون و ژن بوونم بۆیان دیاری كردووم... ئه‌وه باش ده‌زانم! هه‌ر جۆرێک بێ، ئه‌وه ساڵێكی تریش تێپه‌ڕی. ئاوڕ كه ده‌ده‌مه‌وه، جێ پێی خۆم له ڕێگه‌ی پشت سه‌رمدا ده‌بینم. ئه‌زمۆنه‌كان هی خۆمن و زۆریانم زۆر گران به ده‌ست هێناوه، بێ هه‌ندێكیان ده‌متوانی بژیم، هه‌ندێكیان به‌ڵام كردوویانم به ئه‌و شته‌ی ئه‌مڕۆ هه‌م و هه‌ر ئه‌وه جۆرێک ئارامیم پێ ده‌به‌خشێ. ژیان بۆ من یانی هه‌ڵوێست گرتن، یانی له جێیه‌ک به‌م باوه‌ره گه‌یشتن كه هه‌ر شتێک نرخی خۆی هه‌یه و ئاماده بی ئه‌و نرخه به ته‌واوی بده‌ی. هه‌ڵه‌م له ژیاندا زۆر زۆر بووه، به تایبه‌ت له‌وێ كه ویستوومه وڵامه‌كان ببینمه‌وه، دره‌نگ به‌وه گه‌یشتم كه هه‌ندێ جار دیتنه‌وه‌ی پرسیاره‌كان گرنگترن. بۆشایی له‌ت و په‌ته‌كانی ڕۆحه له‌ت و په‌ته‌كه‌ی خۆم هێشتا زۆری ماوه پڕبێته‌وه. ئه‌و بۆشاییانه زۆر جار ده‌مترسێنن، زۆر جار له زه‌ین و ناخی پڕ له پارادۆكسی خۆم سه‌رم سووڕده‌مێنێ. چاوه‌ڕوانیم له په‌یوه‌ندییه‌كانم كه‌متر و كه‌متر ده‌بێته‌وه، ئه‌وه ژانی زۆره! جار هه‌یه له په‌یوه‌ندییه‌كانمدا هیچ شتێک به مافی خۆم نازانم. كاتی وا هه‌ست به دووری ده‌كه‌م. جار هه‌یه بوونی كه‌م و كاڵی كه‌سێک یان شتێک- كه خۆشم ده‌وێ- ناخۆشتره تا نه‌بوونی. هه‌ر بۆیه‌ش من ژانی نه‌بوونم پێ خۆشتره تا تاسه و تاڵیی كه‌م بوونیان! بۆ یه‌ک چركه‌ش هه‌ست ناكه‌م تێپه‌ڕ بوونی ئه‌و ساڵانه "عاقڵی" كردووم، به تایبه‌ت به پێی ئه‌و تاریفه‌ی له عه‌قڵ له لای ئێمه هه‌یه، كه چوارچێوه‌كان ته‌سكتر ده‌كاته‌وه. شته‌كان به پێی عه‌قڵی لای خۆمان ڕه‌ش یان سپین. پێوانه‌ی عه‌قڵ له لای ئێمه زۆرتر "وامه‌كه و وامه‌ڕۆ" یه، به‌وه‌ش زۆر ڕێگه‌ت لێ ده‌گرن، كه‌چی من زۆر ڕێگه‌م تاقی كردۆته‌وه. من دره‌نگتر له‌وه‌ی ده‌بوایه ده‌ستم پێ كرد، ڕه‌نگه دره‌نگتریش ده‌گه‌م به‌و جێگه‌یه كه ده‌بێ! به‌ڵام ئه‌وه‌ی ئه‌و ساڵانه فێری بووم و به‌لامه‌وه زۆر زۆر گرنگه، هه‌ستی به‌رپرسایه‌تییه. كه من خۆم به‌رپرسی كاره‌كان، هه‌ڵه‌كان، ویسته‌كان و ئاواته‌كانی خۆمم. ....... ساڵێكی تریش تێپه‌ڕی و من گه‌وره‌تر بووم ، كه‌چی هێشتا وه‌ک منداڵێک ده‌توانم تاسه‌ی باوه‌شی دایكم بكه‌م، هێشتاش دڵته‌نگی بیستنی ده‌نگێک ده‌بم كه پێم بڵێت " كچــــــم"! هێشتا زۆر شار و شوێن هه‌ن حه‌ز ده‌كه‌م بیانبینم. زۆر كه‌س هه‌ن حه‌ز ده‌كه‌م بیانناسم، زۆر ڕێگه هه‌ن حه‌ز ده‌كه‌م پێیاندا بڕۆم، هێشتاش حه‌ز ده‌كه‌م كۆڵه پشتیه‌كه‌م بخه‌مه پشتم و به شار وگونده‌كانی دوور و نزیكدا بگه‌ڕێم، حه‌ز ده‌كه‌م دڵم، جارێكی تر، به ده‌نگی عود و هه‌ناسه‌كانمان بكه‌وێته له‌رز. هێشتا خۆزگه‌ی له ئامێز گرتنی كوڕه چاوڕه‌شه‌كه‌م دانه‌مركاوه. خۆ نازانم ئێستا له ئاواته‌كانم نزیكترم یا دوورتر كه‌وتوومه‌ته‌وه. نازانم تا كوێ ده‌ڕۆم و به چی ده‌گه‌م... ده‌زانی، گرنگ نییه! هیچ شتێک گرنگ نییه ئه‌وه نه‌بێ كه من تاقه یه‌كجار ده‌ژیم و ده‌مه‌وێ به‌شه‌كه‌ی خۆم وا بژیم كه خۆم ده‌مه‌وێ، كێ ده‌ڵێ به‌یانی به‌شی منی پێیه! ساڵێک گه‌وره‌تر بووم. پیرۆزم بێ :)
Comments:
Post a Comment
|
