|
April 24, 2006
بۆ مه‌رزه جه‌وانمه‌رد! ده ساڵم. به‌شی هه‌ره زۆری كتێبه‌كانمان له ناو ته‌لیس و كارتۆنان چوونه ژێر گڵ و به‌شێكی تری "ئه‌وان" بردییان، ته‌نانه‌ت كتێبه‌كانی من كه هه‌مووی چیرۆكی منداڵان به زمانی فارسین.... ماڵی بێ كتێب وه‌ک له‌شی بێ گیان وایه. یانزده ساڵم. له كۆڕی سروودی مه‌دره‌سه‌دا بووم. سروودی "خوایه وه‌ته‌ن ئاوا كه‌ی" ته‌مرین ده‌كه‌ین و ڕۆژی خۆی به‌ڵام بوومان نییه بیخوێنینه‌وه. من و سینا به‌رپرسی ڕۆژنامه‌ی دیواری مه‌دره‌سه‌كه‌مان- هه‌تاو- ین. ده‌قی شێعره‌كه له گۆشه‌ی سه‌ره‌وه‌ی ڕۆژنامه‌كه‌مان داده‌نێین. ڕۆژنامه‌كه‌مان له دیوار ناده‌ن! چوارده ساڵم. له حه‌وشی مه‌دره‌سه‌ی شه‌ره‌ف من و شلێر و په‌خشان و شایسته له ده‌وری یه‌ك كۆ ده‌بینه‌وه و دوور له چاوی "خواهر صالحی" به‌رپرسی ئیرشادی ئیسلامی مه‌دره‌سه، سـروه ده‌خوێنینه‌وه. هیچمان پیته كوردییه‌كان به باشی ناناسین. مانای وشه‌كان له یه‌کترین ده‌پرسین. هه‌ر ئه‌و ساڵه من له به‌شی یه‌كه‌می كێ به‌ر كێی ئینشا نووسین دا یه‌كه‌م دێمه‌وه. بۆم نییه به‌ڵام له به‌شی دووهه‌می كێ به‌كێ كه‌دا به‌شدار بم. هۆیه‌كه‌ی؟ له كۆتایی ئینشاكه‌كمدا - بێ ئه‌وه‌ی بیرم لێ كردبێته‌وه- به جێی لیــــــــلا نووسیبووم له‌یــــــــــــلا. پانزده ساڵم. مامۆستای ئه‌ده‌بیاتی فارسی، ئاغای ئیبراهیمی، پێمان ده‌ڵێ ئینشایه‌ک له سه‌ر هه‌رچی پێمان خۆشه بنووسین. ڕۆژی خۆی خۆم داوا ده‌كه‌م ئینشاكه‌م بخوێنمه‌وه. هه‌ڵده‌ستمه سه‌ر پێ، ڕووبه‌ڕووی كچهكان، كتێبی پاشه‌ڕۆک ده‌ردێنم. لاپه‌ڕه‌ی هه‌فتاوچوار ده‌كه‌مه‌وه. خۆم ترپه‌ی دڵی خۆم ده‌بیستم. مامۆستا به سه‌یره‌وه چاوم لێ ده‌كات. بێ هیچ پێشه‌كییه‌ک ده‌ست پێ ده‌كه‌م و چیرۆكی "مه‌هاباد" ده‌خوێنمه‌وه. ده‌نگم ده‌له‌رزێ. هه‌ست به گه‌رمی گۆنام ده‌كه‌م. هیچ كه‌س ده‌نگی لێ نایه‌ت... چیرۆكه‌كه كه ته‌واو ده‌بێ سه‌ر به‌رز ده‌كه‌مه‌وه و چاوم به چاوی شلێر ده‌كه‌وێت، فرمێسكی سه‌ر گۆنای و بزه‌ی سه‌ر لێوی ئارامم ده‌كاته‌وه. هه‌موو كچهكان چه‌پڵه لێده‌ده‌ن و پێیان له عه‌رز ده‌كووتن. بۆ ئه‌وه‌ی بێده‌نگی مامۆستا بشكێنم به فارسی ده‌ڵێم: این بود انشای من! و ده‌چم داده‌نیشم ... "ئینشاكه‌م" بوو به بیست و نمره‌ی ئینزباتم بوو به دوانزده. شانزده ساڵم و سووڕی ده‌وران ده‌خوێنمه‌وه و شتێک كه له هیچ شتێک ناچێ، پڕم ده‌كات. یه‌كه‌م جاره وشه‌ی ژن، مرۆڤ، ماف و ئازادی له په‌نای یه‌ک ده‌بینم و سه‌رشێتییه‌كانی خۆم ناو په‌یدا ده‌كه‌ن. له چوارچێوه‌كان دێمه ده‌ر! فێری خه‌و بینین ده‌بم! .... ئێستا، ئه‌مشه‌و لێره، له پشت مێزه شپرزه‌كه‌ی ئاشپه‌زخانه‌كه‌م، دانیشتووم. وشه‌كانی تۆ له گوێمدایه و ڕوو له هه‌ر لایه‌ک ده‌كه‌م مامۆستا ده‌بینم له سه‌ر دۆشه‌گێكی هه‌وری دانیشتووه. شتێک وه‌ک شه‌رم، بێ ده‌سه‌لاتی و تاسه داگیری كردووم و پڕ پڕ پڕم له ڕێز و خۆشه‌ویستی بۆ ئه‌و مرۆڤه كه منی له خۆم نزیک كرده‌وه، كه فێری كردم به زمانی خۆم بیر بكه‌مه‌وه، كه وای كرد زمانی كوردیم خۆشبوێت! ده‌زانی، هه‌ر ویستم بڵێم چ فه‌رق ده‌كات ئه‌م و ئه‌و چی ده‌ڵێن تا ئه‌و ڕۆژه‌ی تۆ و وه‌ک تۆ هه‌ن ته‌پ و تۆزی سه‌ر ڕاستییه‌كان لاده‌ده‌ن! ده‌زانم به‌هایه‌كی قورسی دا، بمرم بۆ ته‌نیاییه‌كانی ... تازه دره‌نگه و ئه‌و دوور. ناتوانم ماندوویی ده‌سته‌كان و ته‌نیاییه‌كانی لێ بدزم، به‌ڵام خۆ ده‌توانم، ده‌زانم كه ده‌توانم "كیژی وریای چاوكراوه‌ی فێره زانین" بم و قه‌ت له بیرم نه‌چێته‌وه كێم و له كوێرا هاتووم. شتێک پێم ده‌ڵێ ئه‌ویش ئه‌وه‌ی پێ خۆش ده‌بێ!
Comments:
Post a Comment
|
