|
July 31, 2009
Keçê Kurdan Keçê biner çerxa cîhan Zor girêdane me re zor Jin çû ne pêş pir dixwînin Êdî qelem ket şûna şûr Keçê em dixwazin bi me re werin şêwrê Dilo em dixwazin bi me re werin cengê Hayê hayê em keçikê kurdan in Şêrin em li cengê em li hêviya merdan in Hayê hayê em kulîlkê kurdan in Derdê nezana berbendî serhildan in Serê xwe rake keça kurdan Dil û cegerêm heliyan Ka niştiman ka azadî Ka dayika me sêwiyan Keçê em dixwazin bi me re werin şêwrê Dilo em dixwazin bi me re werin cengê Hayê hayê em keçikê kurdan in Şêrin em li cengê em li hêviya merdan in Hayê hayê em kulîlkê kurdan in Derdê nezana berbendî serhildan in Aynur Dogan
July 25, 2009
میوانە شیرینەکە بیستم کە هاتووی. بیستم چاوڕوانییەکانی تۆش کۆتایی هات و بە دیداری یەک شادبوونەوە. دەزانی گوڵی گیان من و تۆ قەت ئەو دەرفەتەمان پێ نادرێ یەک بناسین، دەرفەتی یەک بینین و یەک بیستنمان پێ نادرێ. تۆ لە دونیایەکدا دەژی کە من بە جێم هێشتووە. کەچی، سەرەڕای ئەو نامۆییەی نێوانیشمان ڕیشەکانی من و تۆ لە شوێنێک کە کەس زەفەری پێ نابات و بە شێوەیەک کە کەس ناتوانێ حاشای لێ بکات لە یەک گرێ دەدرێینەوە. چیرۆکی ژیانی تۆ لە هەمان شوێن دەنووسرێتەوە کە هی من! تۆ لە هەمان ماڵدا گەورە دەبی کە من تێیدا پێکەنیووم، گریاوم، لە خۆم گەڕاوم و لە خەڵکانێکی تر دا وون بووم. تۆ لە هەمان شار دا پێ هەڵدەگری کە من ئاشنای شەقامەکان و کۆڵانەکانیم، لە هەمان شاردا کە کوچەیەکی هەیە جێ پێی بیرەوەرییەکانی منی پێوە دیارە، هەمان شار کە ئیتر منی لە بیر نەماوە! هەمان شار کە حاشای لە بوونم کرد! گوڵە جوانەکە تۆ قەرارە دەگەڵ خەڵکانێک کە من دەیانناسم بژی، لە ناو ئەواندا پێ هەڵدەگری، زمان دەکەیەوە، گەورەدە بی! گەورە دەبی و شار و شەقامەکانیت خۆش دەوێت و لە هەر گۆشەیەکی بیرەوەرییەکت دەبێ. نامەوێ بترسێنم بەڵام ڕاستی ئەوەیە هەر ئەو خەڵکانە دڵت دەشکێنن، بریندارت دەکەن، دەتگرێنن، وا دەکەن کە لە ناوێندا هەست بە تەنیایی دەکەی، دا دەکەن ڕۆژێک ئیتر ئەوێ بە ماڵی خۆت نەزانی ... جا من لەوەی دەترسم ئەوانی لەوێن، ئەوانی خۆشیان دڵیان شکاوە، بریندار بوون، گریاون و تەنیا ماونەتەوە و شاریان بە ماڵی خۆیان نەزانیوە، چیرۆکەکی تۆ ببیستنەوە و باوەڕت پێ نەکەن. دەترسم فێرت کەن خوو بەو شتانە بگری. دەترسم فێرت بکەن بزه، بە دەنگی بەرز پێکەنین و بێ ترس چوونە دەر بە مافی خۆت نەزانی. دەترسم چیرۆکی منداڵییەکانی تۆ دووپاتەی چیرۆکی منداڵییەکانی من بێت. دەترسم، دەترسم تۆش لە دەرێ سەرداخەی، دەترسم تۆش شەرمن و بێدەنگ بی، دەترسم تۆش خۆت کۆم کەیەوە سنگ و مەمکێک کە هێشتا سەری هەڵنەداوە دیار نەبێت. دەترسم فێرت بکەن دەگەڵ عادەت بژی. دەترسم فێرت بکەن بترسێی. دەترسم فێرت بکەن بە ترسەوە بژی. دەترسم ئاواتەکانت بچووک بن! دەترسم ئاواتەکانت بچووک بن! ئەوانەت ئێستا پێ دەڵێم چوونکە من و تۆ قەرار نییە یەک ببینین، چوونکە من و تۆ دەرفەتی یەکتر ناسینمان پێ نادرێ. ئەوانەت پێ دەڵێم با بزانی جوورێکی دیش ژیان هەیە. دەگونجێ تۆ بۆ کەس نەژیت. دەگونجێ ئاواتەکان هین خۆت بن. ئەوانەت پێ دەڵێم تا باوەڕیان پێ نەکەی ئەگە پێیان گوتی " بەشی تۆ لە ژیان هەر ئەوەندەیە". گوڵەکەم دەمەوێ بڵێم فێری خەو بینین بە. فێر به ئاواتی گەورەت هەبێ. فێر بە بوێری ئاواتی گەورەت هەبێ. شتەکان و کەسەکان وا دەکەن خۆ لابدەی، شوێن بۆ ئەوان چۆڵ کەی. وا دەکەن خەت لە سەر خۆت و خەونەکانت بکێشی، وا دەکەن لە ناو بازنەیەکی داخراودا بژی، وا دەکەن سنوورە سوورەکانی لە دەوریان کێشاوی دانەبەزێنی. وا دەکەن قەت گەورە نەبی. ئاوات پێ‌دەڵێم، چاو دەکەیەوە و دەبینی چاوەڕوانییەکان لە تۆ ئەوەیە جوان و زەریف و شیرین و لە سەر دڵان و لەبار و ... بی. چاوەڕوانییەکان لە تۆ ئەوەیە قەت نەپرسی بۆ و نەزانی بۆ. گوڵەکەم ڕاستی ئەوەیە لە باشترین شوێنی دونیا لە دایک نەبووی، دەگەڵ باشترین خەڵکانی دونیا ناژیت. باشترین یاساکان و داب و نەریتەکان نین کە دەبێ دەگەڵیان گەورە بی. لەوێ کە تۆ دەژیت تۆی مرۆڤ هێشتا بە نیوە مرۆڤ دەبیندرێی. مافی بڕیاردان لە سەر ژیانی خۆتت نییە. ئەوەی عەیب نییە بۆ تۆ شەرمەزاری بەدواوەیە. لەشت هی خۆت نییە، بیرەکان و بڕیارەکان هی خۆت نین. لەوێ کە تۆ لە دایک بووی تۆ بۆ خۆت ناژیت ... گوڵم ئەوانه‌ت پێ دەڵێم با فێری نا گوتن بی. با فێڕی پرسیار کردن بی. با لە خۆت بپرسی بۆ، با شتەکان بەرییە ژێر پرسیار. با لە ژێر قورسایی باری هەست بە تاوان کردن کۆم نەبییەوە، تا فێر بی قیت قیت بە ڕێگەدا بڕۆی و نەهێڵی کەس سنوورەکانت پێ شێل کا. ئەوانەت پێ دەڵێم تا بزانی ژیانێکی ئاسانت لە پێش نییە بەڵام دڵنیا بە بایەخی ئەوەی هەیە شەڕی بۆ بکەی! به خێر بێی گوڵی من!
July 19, 2009
شاڵێکی سەوزم بە سەر شان داداوە. پێنج دەقەش تێ نەپەڕیەوە دوو سێ چوار کەس کۆمێنتیان لە سەر داوە. یەکیان گوتی "موسەوی چیی تۆ؟! ئەمەی تریان گوتی بووی بە ئێرانی؟ جوان لە بیرە بەیانییەکەی کە شاڵەکەم بە سەر شانم دادا ئەوەی بیرم لێ نەکردبووە ڕنگی سەوزی بوو. بیرم چوو بۆ کراسە سەوزەکەم و دامەنە سەوزەکەم و گوارە سەوزەکانم کە هێندە حەزم لێیانە. وەبیرم هاتەوە جاری یەکەم نییە ڕەنگەکان بەش دەکەن و بە دوایی ئەو دابەش کردنانە مرۆڤەکان دەخەنە ناو گروپ و دەستە و ناوی خۆمانە و غەیرە خۆمانەی لە سەر دادەنێن. خەیاڵم بەڵام زۆر لە لای ئەو بیرانە نەگیرساوە. بیرم زۆرتر لە قسەی یەکێ لەو جەماعەتە کردەوە کە گوتی "بووی بە ئێرانی؟" بووم بە ئێرانی؟ ئەوە یانی چی؟ من خەڵکی کوێم؟ بەشەکەی من لە خاک چی بە سەر هاتووە؟ مەگە ڕاستییەکە ئەوە نییە هەر چی لەوێ رووبدات داوێنی کەس و کار و دۆست و ئاشنا و عەزیزەکانی من دەگرێتەوە؟ مەگە ڕاستییەکە ئەوە نییە من لە بستێک خاكی ئەوێ لە دایک بووم؟ مەگە لەوێ پێم هەڵنەگرت؟ مەگە لەوێ زمانم نەکردەوە؟ لەوێ گەورە نەبووم؟ مەگە شۆڕش و شەڕ و شپرزەیی ساڵانی دوور ژیانی منیشی نەشێواند؟ مەگە کومیتەچییەکان هەزار هەزار جاریان ڕانەگرتووم؟ مەگە ژووره تەر و تاریکەکەی کومیتەی ورمێ ترسی نەخستۆتە دڵمەوە؟ مەگە ڕاستییەکە ئەوە نییە هەموو بیرەوەرییەکانی سەردەمی منداڵی من لەوێ سەریان هەڵداوە؟ مەگە مێژووی ئەوێ تێکەڵاوی مێژووی ژیانی من نییە؟ بووم بە ئێرانی؟ ئەوە یانی چی؟ کورد بوونم بەشێک لە منە. لەوەی کە هەم. لەو مرۆڤەی ئەمرۆ هەم. بەشێک لەو ژنەی ئێستا هەم. لە بیرم نایە قەتم حاشا لە کوردبوونی خۆم کردبێ. کوردی نووسین، کوردی قسە کردن و لە سەر مێژووی خەباتی کوردەکان خوێندنەوە، من قەت لە سەر زۆرتر زانین و ناسینی مێژووی کورد یەک چرکەش گومانم نەکردووە. هەمیشە بۆم گرنگ بووە ڕیشەکانی خۆم بناسم و دەزانم ڕیشەکانمان لە یەک گرێ دراوە. ڕاستی ئەوەیە: ئەو گەزە ئاسمانەی من لە ژێری گەورە بووم، ئەو بستە خاکەی بۆنی دایکمی لێ دێ، ئەو کۆڵانانەی ڕەنگی بیرەوەرییەکانی منی پێوە دیار بووە، ئەو شەقامانەی من دڵداریم تێدا کردوون، ئەو شارەی من ئاشنای گەرکەکانیم، ئەو زاراوەی من پێی دەدوێم، ئەو بارانەی عاشقی بۆنی گڵی کردم، هەمووی لەوێن، هەمووی! ڕاستی ئەوەیە: بەشێکی گەورە لە مێژووی ژیانی من لەوێ نووسراوەتەوە... ڕاستی ئەوەیە: چاو لە نەخشە کە دەکەم، شارە خنجیلانەکەم لە سەر نەخشە بۆ هەر کەس کە دەست نیشان دەکەم، ئەوێ دەبینم، سنوورەکانی، ڕەنگەکانی، ئاڵاکەی. هەر چی بیری لێ دەکەمەوە زۆرتر هەست دەکەم ئەوێ بەشی منیشە، تێناگەم بۆ دەبێ حاشای لێ‌بکەم!؟ بۆ دەبێ‌دەست لە بەشەکەی خۆم هەڵگرم؟ ڕاستی ئەوەیە: ئێرانی بوون بۆ من نە شانازی تێدا و نە جێی شەمەزارییە. کورد بوونیش هەر وەتر، بەڵام خۆم بە خاوەنی ئەو بستە خاکەی بۆنی خەونەکان و خەمەکان و خۆشییەکانی بەشێک لە ژیانی منی لێ دێت دەزانم!
July 14, 2009
لە ساردی دەنگی خۆم سەرم سووڕما. خۆمم بیست گوتم: کە مرد سێزدە ساڵ بوو نەمدیبوو. بیستم گوتم: ئیتر "قەت" نایبینمەوە، "قەت" دەنگی نابیستمەوە. لە ساردی دەنگی خۆم ترسام. بیرم کردەوە دڵم چڕژی کەوتۆتە سەر. بیر دەکەمەوە شتەکان نامهەژێنن ئیتر. بیر دەکه‌مەوە دڵم نالەرزێ ئیتر. بە خۆم دەڵێم یانی "دڵم بۆت بە بەرد؟" بیر دەکەمەوە خەمەکان و خۆشییەکان لە سنوورێکی تایبەت کە تێپەڕێن ئیتر وەک خۆیان نامێنن. ئیتر خەم یا خۆشی ئاسایی نین. ئیتر ژان و چێژەکان لە ژان و چێژی ئاسایی ناچن. بیردەکەمەوە دڵی شەیدا بۆ ئەوەی ئۆقرە بگرێ ناو لە سەر شتەکان دادەنێت، دوایی فێر دەبێت دەگەڵ شتە ناودارەکان بژیت. فێر دەبێ "قەت" بۆ خۆی مانا کاتەوە، فێر دەبێ دەگەڵ "قەت" بژیت، فێر دەبێت وەک ماندوویەتی، وەک جێ برینێکی کۆن دەگەڵ خۆی بگێرێت و جارنا بۆ پشوو دان لە گۆشەیەکی کەس پێ نەزانی زەینی حەشاری بدات. فێر دەبێ دەنگی نەلەرزێ، فێر دەبێ "دڵ ڕەق بێ" ... بە خۆم دەڵێم سنوورێک هەیە کە تێپەڕ بوو ئیتر "خۆت" دەگەڵت نایەت...
July 12, 2009
لە یەکشەمەیەکی بێ تام هەوراوی و گەرم وەک ئەمڕۆ، نە پێنج ساعەت بێ‌بڕانەوە کارکردن، نە گۆرانی گوتن، لە مۆسیقا، نە ناڵەی جوادیی هێمن، نە شێعرەکانی بەڕۆژ، نە نامە نووسین و نە نوقم بوون لە بێدەنگیدا، هیچ هیچ هیچ شتێک نەیتوانی بێ‌قەراری ئە وڕۆژانەی دڵمم لێ دوور کاتەوە. ترسێکی تازه لە گۆشەیەکی کەس پێ نەزانی زەینم سەری هەڵداوە. هەست دەکەم هەموو شێتی و شەیداییەکانی ساڵانی ڕابردوو کۆ بوونەته‌وە تا ئەم ساڵ، ڕێک ئەم ساڵ خۆ دەرخەن و هەست دەکەم هەموو دڵتەنگییەکان و تاسەکان سەریان هەڵداوە تا من هەموو دڵتەنگییەکان و تاسەکان بڕشێمەوە و ڕزگارم بێت لە چنگیان. هەست دەکەم ماندووم کردن. ماندووم کردن ئەوەندە چاوەڕێی ڕوودانی ڕووداوێک بووم کە هەر ڕووی نەدا. ماندووم کردن هێندە درۆم دەگەڵ کردن، هێندە بە درۆ دڵخۆشییانم داوە. دوایی لە ڕۆژێکی وەک ئەمڕۆدا لە پڕ، پڕ دەبی لە باوەڕێک کە پێت دەڵێ دەست هەڵگرە. کە پێت دەڵی یاسای ژیان ئەوەیە درەنگ یا زوو پێت دەسەلمێنێ تۆ نیت بڕیار دەدەیت، پێت دەسەلمێنێت ویستن ونەویستنی تۆ بە لایەکی!!!
July 11, 2009
پەیوەندییە دیجیتاڵییەکان هەر دێن و باوتر دەبن. لە یەک شار و هەمان شاریش کە بژین یەک دوو شمارە تەلەفوونی یەکتریشمان کە هەبێت، لە ئێم ئێس. ئێن. و فێیس بووک و یاهوو پەیام بۆ یەک دادەنێین. یەک دوو سێ هاوڕێش هەن بۆ ئەوەی بزانن لە چ حاڵ دام سەردانی بلاگەکەم دەکەن. ئەوە لە "خۆمانەکان". لە شوێنێکی وەک فێیس بووک ڕۆژ نییە یەک دوو پەیامت بۆ نەیەت کە فڵانی و فڵانی دەیانەوەێ تۆ لە لیستی هاوڕێکانیاندا ئەد بکەن. یا حەزرەتی غەوس. خۆ من فڵانی و فڵانی ناناسم چییان لە گیانی من دەوێت... جارێکیان لە وڵامی داواکارییەکی ئاوا کورته پەیامێکم نارد کە بەڕێز باوەڕناکەم من تۆ بناسم. وڵامی ناردەوە کە دەی چییە نامناسی. ئەدم بکە و بمناسە". جارێکی دی کەسێکی دی لێشم توڕە بوو کە بۆ ئەدی ناکەم، چاوم دەرێ نایناسم، ئێستا کە ئەو شانازییەم هەبوو ئەو داوام لێ‌بکات ئەدم بکات ئەو ئەدا وئەتوارەم لە چییە. بەڕێزێکیش نووسیبووی ئەوە لە خۆت ئاشکرا کرد، تۆ تەواری و بڵاگ دەنووسی و تازه بۆ حاشا نابێ! جا وەرە دەست بە قورئان دابدە کە قەتم حاشا لێ‌نەکردووە .. بە هەر حاڵ دەمەوێ ئەوەی بڵێم کە فێیس بووک دونیای زۆر بچووک کردۆتەوە. من دەزانم هاوڕێکانم لە کوێن و چی دەکەن و کەی دەچنە کوێ و لەوێ کە هەن خەریکی چین. دەزانم قەرارە کێ‌ببینن و چی بخۆن و چەندە بخۆنەوە. کەچی ئەوانە هیچی تاسەی دڵتەنگی و بیرکردن دانامرکێنن. من ئاگام لە حاڵ‌و ڕۆژی هاوڕێیەکان هەیە کەچی دڵتەنگی بیستنی دەنگیان و گەرمای ڕوانیان لە سەر جێی خۆیەتی. شتە تایبەتە بچووکەکان کە ئەوان دەکات بە ئەوان ئیتر هەست پێ‌ناکرێت. نابیندرێت. یەکیان عادەتێتی پێش وڵام دانەوە چرکەیەک بێدەنگ چاوت لێ دەکات و دوایی نەرم و لە سەرخۆ دەست دەکا بە قسەکردن، ئەوی تریان کە قسە دەکات دەستی ناسرەوێ، یەکیان بە "نازانم بەڵام من پێموایە ..." دەست پێ دەکات و .... ئەو پێشەکییە دوورو درێژە بۆ ئەوە بوو بڵێـم ڕاستە فێیس بووک دونیای بچووک کردۆتەوە کەچی مرۆڤەکان لە یەک دوورتر و دوورتر دەبنەوە. هممم، دوورتر و تەنیاتر ...
July 2, 2009
دڵتەنگ نیم، دڵم بەڵام ئێشاوە، سەیر زۆر! |
|
- - - - - - - Archives
|
